Shri Harisharanashtakam | Sanatani

श्रीहरिशरणाष्टकम्

Shri Harisharanashtakam

Brahmananda Paramahamsa Swami

ध्येयं वदन्ति शिवमेव हि केचिदन्ये
शक्तिं गणेशमपरे तु दिवाकरं वै ।
रूपैस्तु तैरपि विभासि यतस्त्वमेव
तस्मात्त्वमेव शरणं मम दीनबन्धो ॥1

नो सोदरो न जनको जननी न जाया
नैवात्मजो न च कुलं विपुलं बलं वा ।
सन्दृश्यते न किल कोऽपि सहायको मे ।
तस्मात्त्वमेव शरणं मम दीनबन्धो ॥2

नोपासिता मदमपास्य मया महान्त-
स्तीर्थानि चास्तिकधिया न हि सेवितानि ।
देवार्चनं च विधिवन्न कृतं कदापि ।
तस्मात्त्वमेव शरणं मम दीनबन्धो ॥3

दुर्वासना मम सदा परिकर्षयन्ति
चित्तं शरीरमपि रोगगणा दहन्ति ।
सञ्जीवनं च परहस्तगतं सदैव ।
तस्मात्त्वमेव शरणं मम दीनबन्धो ॥4

पूर्वं कृतानि दुरितानि मया तु यानि
स्मृत्वाखिलानि हृदयं परिकम्पते मे ।
ख्याता च ते पतितपावनता तु यस्मात् ।
तस्मात्त्वमेव शरणं मम दीनबन्धो ॥5

दुःखं जराजननजं विविधाश्च रोगाः
काकश्वसूकरजनीर्निरये च पातः ।
ते विस्मृतेः फलमिदं विततं हि लोके ।
तस्मात्त्वमेव शरणं मम दीनबन्धो ॥6

नीचोऽपि पापवलितोऽपि विनिन्दितोऽपि
ब्रूयात्तवाहमिति यस्तु किलैकवारम् ।
तं यच्छसीश निजलोकमिति व्रतं ते ।
तस्मात्त्वमेव शरणं मम दीनबन्धो ॥7

वेदेषु धर्मवचनेषु तथागमेषु
रामायणेऽपि च पुराणकदम्बके वा ।
सर्वत्र सर्वविधिना गदितस्त्वमेव ।
तस्मात्त्वमेव शरणं मम दीनबन्धो ॥8

इति श्रीमत्परमहंसस्वामिब्रह्मानन्दविरचितं श्रीहरिशरणाष्टकं सम्पूर्णम् ।

Search Scriptures