Parameshvara Stotram | Sanatani

परमेश्वरस्तोत्रम्

Parameshvara Stotram

Traditional

जगदीश सुधीश भवेश विभो
परमेश परात्पर पूत पितः ।
प्रणतं पतितं हतबुद्धिबलं
जनतारण तारय तापितकम् ॥1

गुणहीनसुदीनमलीनमतिं
त्वयि पातरि दातरि चापरतिम् ।
तमसा रजसावृतवृत्तिमिमं ।
जनतारण तारय तापितकम् ॥2

मम जीवनमीनमिमं पतितं
मरुघोरभुवीह सुवीहमहो ।
करुणाब्धिचलोर्मिजलानयनं ।
जनतारण तारय तापितकम् ॥3

भववारण कारण कर्मततौ
भवसिन्धुजले शिव मग्नमतः ।
करुणाञ्च समर्प्य तरिं त्वरितं ।
जनतारण तारय तापितकम् ॥4

अतिनाश्य जनुर्मम पुण्यरुचे
दुरितौघभरैः परिपूर्णभुवः ।
सुजघन्यमगण्यमपुण्यरुचिं ।
जनतारण तारय तापितकम् ॥5

भवकारक नारकहारक हे
भवतारक पातकदारक हे ।
हर शङ्कर किङ्करकर्मचयं ।
जनतारण तारय तापितकम् ॥6

तृषितश्चिरमस्मि सुधां हित मे-
ऽच्युत चिन्मय देहि वदान्यवर ।
अतिमोहवशेन विनष्टकृतं ।
जनतारण तारय तापितकम् ॥7

प्रणमामि नमामि नमामि भवं
भवजन्मकृतिप्रणिषूदनकम् ।
गुणहीनमनन्तमितं शरणं ।
जनतारण तारय तापितकम् ॥8

इति परमेश्वरस्तोत्रं सम्पूर्णम् ।

Search Scriptures